grfsdfsfsdf...fsdfsd

"Yoqimsiz budilnik ovozi yana vaqtli turish kerak. Uff ishga borgim kelmayapti, bu juda zerikarli va yoqimsiz. Ish kuni qachon tugar ekan? Soatga qarayapman-u, ammo vaqt hech o’tmayapti. Bugun chorshanba. Bu haftada yana ikki kun ishga borish kerak, ana undan so’ng yakshanba keladi. Shu ikki kun o’tsa-yu ketsa, dam olish kuni kelaqolsa. Bu ishni yomon ko’raman." Shunga o’xshash jumlalarni sevgan kasbi bilan shug’ullanmaydigan insonlardan ba’zan eshitib qolishimiz mumkin.

Uning aksi bo’lsa-chi? "Oh, budilnikning ovozimi men allaqachon nonushta qilib bo’ldim, ishga ketadigan vaqt bo’lib qolibdi-ku. Vaqt qanday tez o’tib ketayapti-a? Kechagina dushanba edi bugun esa juma. Voy hali qancha ishlarga bugun ulgurishim kerak”. Bunday insonlar yuzida doimo tabassum, ishdan qoniqish, hayotdan zavqlanishlarini ko’rishingiz mumkin.

Siz bulardan qay birini ma’qul ko’rasiz? Savolimiz siz nima his qilayotganligingizda emas, nima qilishni xohlashingizda. Ochig’ini aytganda, har qanday inson bunday kishilarga oz bo’lsa-da havas qilmasligiga ishonmayman. Ular har bir kunidan zavqlanishadi. Ular uchun bu qiyin ish emas, shunchaki o’z sevgan kasbi bilan shug’ullanishga imkoniyatdir. Nega deysizmi? Chunki ular bu yo’lni oldindan tanlagan. Siz ham ishingizdan zavqlanishingiz uchun oldin zavqlanish siz uchun nimaligini aniqlab olishingiz kerak. Bu amalni bajarish nafaqat ishingizdan zavqlanish, balki umuman hayotingizdan mamnun bo’lishingizga yordam beradi. Bu yerda ishingizdan qoniqish, undan zavq olishingiz uchun mo’ljallangan bir necha yo’llarni berib o’tmoqchimiz. Bu albatta birdaniga bo’ladigan hodisa emas, bu vaqt talab qiladi, ammo natijalar hayratlanarli darajada bo’ladi.

O’zingizni o’rganing.

• Sizni nima xursand qilishini bilib oling. Shu haqda o’ylab uni qog’ozga tushuring. Ularni ishingizda uchrashi va qanchalar takrorlanishiga e’tibor bermay ro’yxatini tuzing. Buni ishingizga aloqasi yo’q, bu siz o’zingizni anglab olishingiz uchun kerak.
• Har safar o’zingizga "nimaga?” degan savolni bering. Yuqoridagi qadamimiz orqali siz o’zingizni xursand qiladigan narsalar ro’yxatini tuzib oldingiz. Endi ularning har biriga nimaga degan savolni berib uning sababini topib oling. Misol tariqasida siz baliq tutishga borishni xush ko’rsangiz, nimaga degan savol orqali siz do’stlar davrasida bo’lganingiz uchun baliq tutishga borishni xush ko’rasizmi, yoki baliq tutishni o’zini xush ko’rganingiz uchun baliq tutishga borishni yoqtirishingizni aniqlab olasiz. Shu yo’sinda uning ildiziga yetgunga qadar shu savolni beraverasiz. Ana endi sizga kerak bo’lgan asl ro’yxat baydo bo’ldi.
• Sizni nima g’ashingizga tegishini aniqlab oling. Bunda xuddi yuqoridagidek (ikkinchi qadamdadek) aniqlab olasiz. Oldin ularni ro’yxatini tuzib, so’ng nimagaligini aniqlab olasiz. Oddiy misol ertalab ishga borishni yoqtirmassiz. Unda yana nimaga? Balki vaqtli turishni xush ko’rmassiz. Nimaga barvaqt turishni xush ko’rmaysiz? Shu yo’sinda ildizini topguncha. Nimaga? :)
• Sizni yaxshi ishlashingizga sabab bo’ladigan narsalar ro’yxatini tuzing. Masalan, kimlardir ko’proq gap bilan bo’g’liq ishlarda ishlashni xush ko’radi va bu uning yanada ko’proq ijod qilishiga sabab bo’ladi va hokazo. Bu oson emas lekin juda kerakli.

Ishingizni o’rganib chiqing.

• shingizning yaxshi tomonlari. Siz ishingizni xush ko’rmagan taqdiringizda ham uning qaysidir xususiyatlari sizga xush kelishi mumkin. Xotirjamlik bilan chalg’imagan holda ishingizdan mamnun bo’ladigan taraflarini o’ylang. Yomon taraflarini bir chetga qo’yib turib faqat yaxshi taraflarini, sizni xursand qiladiganlarini ro’yxatini tuzing. E’tiboringizdan hech biri qolib ketmasin.
• Nimaga? Xuddi yuqoridagi qadamlarday nimaga degan savolni berib chiqasiz. Va bizda yana bir ro’yxat paydo bo’ladi. Paydo bo’lgan ro’yxat bizga juda ham kerak, uni keyinroq "O’zingizni o’rganing” degan bo’limdagi 2-qadamda paydo bo’lgan ro’yxat bilan solishtirishda kerak bo’ladi.
• Ishingizni yoqtirmaydigan taraflarini yozib chiqing. Buni yozish osonroq bo’lsa kerak. Ammo umumiy narsalarni yozmang. Misol uchun "Men ishimni yomon ko’raman” yoki shunga o’xshash. Aniqlikka e’tibor bering ishchilarmi, yoki ish sharoiti va boshqalar.
• Nimaga? Degan savol bilan ularning barchasini aniqlashtirib olamiz. Boshlig’ingiz yomonmi? "Nimaga, nima uchun?” deb emas, u nimaga aynan sizga yoqmasligini, aynan nimaga sizni bu jahlingizni chiqarishini sabablarini yozing.

Solishtiring.

• Mos kelgan yaxshi taraflarini yozib oling. Sizni umuman xursand qiladigan narsalar ro’yxatini sizni ishxonada xursand va g’ashingizni keltiradigan narsalar bilan solishtiring. Qizig’i shundaki sizni ishxonada g’ashimni keltiradi deb yozgan narsangiz siz meni xursand qiladigan narsalar degan ro’yxatingizdagi amal bilan bir xil bo’lib qolishi mumkin. Masalan, "Ishxonada sherigim ko’p gapirishini yoqtirmayman va insonlar bilan gaplashish meni xursand qiladi”, degan gaplarga o’xshab. ;) Ishxonada yoqtirgan va yoqtirmagan narsalaringiz ro’yxatini meni xursand qiladigan narsalar ro’yxati bilan solishtirib bir xillarini alohida bir qog’ozga yozib oling.
• Mos kelgan yoqimsiz taraflarini yozib oling. Xuddi yuqoridagi qadamga o’xshab, endi sizni ishxonada xursand va g’ashingizni keltiradigan amallar ro’yxatini umuman g’ashingizni chiqaradigan narsalar ro’yxati bilan solishtirib mos kelganini yana alohida bir ro’yxat qiling.
• Qarama-qarshiliklarga e’tibor bering. Ishxonada yaxshi ko’raman degan narsangiz mening g’ashimni keltiradigan narsalar ro’yxatidan chiqishi yoki teskarisi – ishxonada g’ashimni chiqaradi degan narsangiz meni umuman xursand qiladigan narsalar degan ro’yxatingizdan chiqishi mumkin. Ana shunday amallarni alohida yana bir qog’ozga ajratib yozing.
• To’g’ri keladiganlari. Endi alohida bir qog’ozga bir biriga mos tushganlarini yozib chiqing, ya’ni ishxonada yo’qotadigan narsangiz siz umuman yoqtiraman degan ro’yxatga mos tushganlarini, yoki aksincha, ishxonada yoqtirmayman degan narsangiz siz umuman yoqtirmayman degan ro’yxat bilan mos tushsa.
• Bajargan amallaringizni tekshiring. Yuqoriga tuzilgan barcha ro’yxatlarni yaxshilab tekshiring. Xatolik ketmaganiga amin bo’ling. Sizga bu narsa hayotda juda ko’p bora kerak bo’ladi. Shuning uchun erinchoqlikka yo’l qo’ymay bir bajarganda ishlaringiz to’g’riligiga ishonch hosil qiling. Aks holda, keyinchalik bu narsalarni yana boshqatdan qilishingizga to’g’ri kelishi mumkin.
• Tanaffus. Endi ozgina tanaffus e’lon qiling, miya hujayralaringizga dam bering, charchog’ingiz chiqqanidan keyin qolganini davom ettiring. Shoshilmang, tezroq natijaga erishaman deb bekorga xatoliklarga yo’l qo’yasiz. Bir ikki kun dam olib qolganini davom ettiring shunda siz o’zingizni tetik his qilasiz. O’zingizni tayyor yoki yo’q ekanligingizni o’zingiz ham sezasiz. Hatto men shuncha narsani yozguncha boshim tutab ketay dedi. :)

Amallarni bajarish.

• Mas’uliyatni o’z bo’ynigizga oling. Sizning maqsadingiz ishdan zavq olish. Buni bajarish uchun esa siz ijobiy o’zgarishlar qilmoqchi ekanligingizni tushunishingiz kerak. Boshlang’ich ishni bajarganingiz uchun ishlar birdaniga sehrli ravishda o’zgarib ketadi deb o’ylamang. Bu uchun siz o’zingizni xulq-atvoringiz va xohisharingizni har doim inobatga olib yurishingiz kerak.
• Ijobiy tarafdan yondashing. Masalan, boshlig’ingiz kun bo’yi oldingizdan ketmasa, hamkasblaringiz oldida bo’lishni yoqtirishingizni o’ylang, telefoningiz jiringlashdan to’xtamaganda, insonlar bilan muloqotda bo’lishni yoqtirishingizni yodda saqlang, sizdan hamkasblaringiz qo’shimcha ishni qilishni so’rashsa, siz insonlarga yordam qo’lini cho’zish sizni xursand qilishini yodda saqlang. Bu yerda maqsad shuki, siz yuqorida ishda sizni xursand qiladigan narsalar royxatiga ularning to’g’ri kelishi. Sizni ishda xursan qiladigan narsalar ro’yxatidagi amallardan birini ishda bajarganingizda, har gal o’zingizga men bu ishdan xursandman, chunki men ...... yaxshi ko’raman deyishingiz uchun kerak.
• Sizni yaxshi ishlashingizga sabab bo’adigan narsalarga e’tibor bering. Ishingizda sizni yaxshi ishlashingizga g’ayrat, kuch beradigan narsalar bo’lishi kerak. Shu narsalarni qidirib toping. Bu narsani boshlig’ingiz ham bilishi kerak. Boshlig’ingiz bilan shu haqda gaplashing va u shu narsalarni ko’paytirib berishga harakat qilishi mumkin. Bundan uyalmang, siz bir marta so’raysiz va uning ustiga ko’pchilik ish yurutuvchilar so’ragan narsangizni yaratib berishga harakat qiladi. Sababi, ular o’z ishchilarining ishi samarali bo’lishini istaydi. Bu haqda gapirayotganingizda boshliq bilan ishning yaxshi tomonlari haqida gap yuritishga harakat qiling.
• Yomon fikirlarni xayolingizdan chiqaring. Ba’zan ishingizni yomon ko’rishingiz sizga tinchlik bermaydimi yoki ishning ma’lum bir qismimi? Bunday xayollar ongingizni to’ldirib, fikringizni chalg’itadi. Bu esa yaxshimas. Xayolaringizga shunday narsalar kelayotganida fikrni yaxshi narsaga chalg’itishga harakat qiling. Hech bo’lmaganda ishda sizni xursand qiladigan tomonlari haqida o’ylang. Albatta, bu oson emas, ammo harakat qilmasangiz, bu odatiy holga aylanib qolishi mumkin, va undan qutilishingiz qiyin kechadi. Hatto asabiylashishga ham olib kelishi mumkin. Shuning uchun buni oldini olgan ma’qul.
• Tanaffus vaqtini aql bilan sarflang. 20-30 daqiqalik tanaffus vaqtingiz bo’lganida o’zingiz sevgan ish bilan shug’ullaning. Bu hamkasblar bilan yig’ilib gaplashib o’tiradigan vaqt emas. Agar bu mahalliy odat bo’lsa undan chetlangan ma’qul. Ulardan kimdir sayr qilishni yoqtirsa u bilan sayr qiling va bugungi kunda bo’layotgan voqealar, xabarlar haqida gaplashing. Tushlik vaqtida ijobiy insonlar bilan gaplashing, ishga salbiy nuqtai nazardan qaraydigan kishilardan uzoqroq bo’lishga harakat qiling. Insonlar bir-biriga ta’sir ko’rsatadi. Salbiy insonlardan sizga ham salbiy xislatlar o’tadi. Siz ham ishingiz haqida salbiy o’ylay boshlaysiz. Ishni yaxshi ko’radigan insonlar bilan gaplashsangiz ishingiz haqida ijobiy o’ylay boshlaysiz.
• O’zingizni ishontiring. Buni ko’pchilik foyda bermaydi deb o’ylaydi, aslida unday emas bu juda foydali va amaliyotda o’zini oqlagan. Etralab turib oynaning oldiga kelib men bugun kunimni yaxshi o’tkazaman deyish sal g’alatiroq tuyilishi mumkin, ammo bu insonga katta yordam berar ekan. Yuqorida yomon xayollar inson ongida o’rnashib uni ruhiy tushkunlikka olib kelishi mumkinligi haqida gaplashgan edik. Xuddi shunga o’xshab yaxshi xayollar ham inson ongida o’rnashib, uning kayfiyati yaxshi bo’lishiga xizmat qilar ekan. Boshlanishida bu sizga yordam bermayotgandek tuyilishi mumkin, ammo vaqt o’tishi bilan albatta foydasini sezasiz. Shuning uchun tashlab qo’ymasdan buni davom ettiring. Buni har kuni ertalab bajaring. Sizni ishxonada xursand qiladigan amallar ro’yxatini ham tosh oynaga yopishishtirib qo’yib har kuni ertalab uni oldiga kelganingizda bir marta o’qib turing va tez orada siz buning foydasini sezasiz.
• Natijasini ko’ring. Siz yuqoridagi maslahatlarga amal qilsangiz, demak tez orada uning foydasini ko’rasiz. Boshlanishida bu chaqaloqning qadamlari kabi qiyin va natijalari sekin bo’ladi, siz o’zingizni nazorat qilib borishingizga to’g’ri keladi. Natija albatta bo’ladi faqat ularni sezish sizning qo’lingizda. Natijalarni sezganingizda juda ham xursan bo’lasiz. Bu esa sizning keyingi yaxshi natijalarga erishingizga zamin yaratib beradi. Har safar natijalar oldingisidan ko’ra tezroq kela boshlaydi. Lekin bir narsani unutmang: bu hayot, unda bir kun yaxshi bo’lsa, bir kuni sal omadsizroq kelishi mumkin, shuning uchun hayotning bunday qorong’u kunlarini tezda xayoldan chiqarib olg’a qarab intiling va faqt unga ijobiy yondashishga harakat qiling. Hatto dunyodagi eng baxtli kishi ham, men umrimdagi har bir kunidan qoniqdim deb ayta olmaydi, ya’ni har bir kuni menga quvonch olib keldi deb, chunki hayotda normal odamda bunday hol kuzatilmaydi. Shunday ekan, bunday kunlarni faqat tez unutish, yaxshi kunladan esa bahramand bo’lish kerak. Sizga omad tilaymiz, ishingiz o’ngidan kelsin.

Maslahatlar:

• Agar siz shunda ham ishingizdan qoniqmasangiz, yuqoridagilar sizga yordam bermagan bo’lsa, yangi ish topishda yuqorida aniqlab olgan sizni xursand qiladigan amallar ro’yxatidan foydalaning. Bir marta qilgan xatongizni ikkinchi marta takrorlamang.
• Ish qidirish vaqtida insonlar o’ziga yoqadigan ishni topishlari mumkin, lekin bu ham ma’lum vaqt talab qiladi, balki siz o’zingizning ishingizga o’xshagan ishni, ammo g’ashingizga tegadigan taraflarisiz toparsiz. Yoki sizning hozirgi ishlayotgan joyingizdan har taraflama mukammal ish topishingizga sabab bo’larsiz. Yoki aksi, siz o’zingizni ishingizni boshqa ishlarni ko’rganingizdan so’ng yaxshi ko’rishingizni anglab yetarsiz.
• 3Ishdan charchagan bo’lsangiz ta’til oling balki aynan shu sizning bezishingizga sabab bo’layotgandir. Sizning ishga sovuqqonligingiz boshqalarga ham ta’sir qilishi mumkinligini unutmang.
• Ishda oladigan maoshingizdan bir qismini har doim alohida fond sifatida yig’ib boring. Bu bir yoki ikki yil vaqtni olishi mumkin. Nimaga kerak deysizmi ? Sababi siz yangi ish qidirib topishingiz oson bo’lmasligi mumkin siz yoqtiradigan ishni topishingizga hatto 6 oylab vaqt ketishi mumkin. Aynan shu vaqtda siz asrab qo’ygan pullaringiz sizga yordam bo’ladi. Eng yaxshisi esa hech qachon yangi ish topmasdan oldingisini tashlamang ;)
• Sizga yoqmagan insonlar tufayli ishni tashlab ketmang. Har xil mish-mishlar, gap so’zlarga e’tibor bermang. Ba’zan unday insonlarga uning qaysidir sizga yoqqan xislatini aytish uning sizga bo’lgan munosabatini o’zgartirishiga sabab bo’lishi mumkin. Nima bo’lganda ham ish tashlashdan oldin boshqa yo’llarini o’ylab ko’ring, ish tashlash bu oxirgi yo’li. Balki ular aynan sizning joyingizni ko’zlab shu ishni bajarayotgandir.
• Donishmandlar aytadiki, har joyda o’zining yaxshi tomoni bo’lganidek yomon tomoni ham bo’ladi. Yomg’irdan qochib do’lga tutilmang. Siz yollanmoqchi bo’lgan joyda, balki sizga yoqmaydigon odamlar bitta emas ikkitadir, sizning g’ashingizga tegadigan narsalar oldingisidan ham ko’pdir. Shuning uchun eski ishdan ketishdan oldin yangi ishingizni yaxshilab o’rganib chiqing. Axir mashoyiqlarimiz aytishadi-ku " yeti o’lchab, bir kes”…
  
  Sizga omad tilab Abdullayev Ilhomjon
  
  Kunigiz yaxshi o’tsin :)

Manba: Maslahat.uz